Nye Espenes rasteplass, Hardanger – ein installasjon verdt ventetida

Ein verdspandemi, frakt av stål til havs heilt frå Kina og ruskever på Vestlandet. Utfordringane har stått i kø for det nye designbygget på Espenes, langs Nasjonal turistveg Hardanger. Men til sommaren skal bygget stå klart, trass i dei mange utfordringane. Den gamle rasteplassen på Espenes i Ullensvang kommune blei borte etter rassikringa av riksveg 13. På den tomme flata skulle Statens vegvesen opna eit nytt moderne turistveganlegg med flott utsikt nordover Sørfjorden hausten 2021. Servicebygget med ein 64 meter lang og 4 meter brei takkonstruksjon i stål, med 12 takmodular i ulik høgde, halden oppe av massive stålsøyler, fundamentert på ei botnplate i betong, skulle markera Espeneset som ny tilvekst til attraksjonen Nasjonale turistvegar.